அதிமுக முன்னாள் சுகாதாரத்துறை அமைச்சரும், சமீபத்தில் தமிழக வெற்றிக் கழகத்தில் (தவெக) இணைந்து புதுக்கோட்டை மாவட்டச் செயலாளராகவும் உருவெடுத்துள்ள சி.விஜயபாஸ்கருக்கு, அமலாக்கத்துறை மீண்டும் சம்மன் அனுப்பியிருப்பது, தமிழக அரசியல் வட்டாரத்தில் மிகப்பெரிய புயலைக் கிளப்பியுள்ளது!
ரூ.35.79 கோடி சொத்துக் குவிப்பு: வழக்கின் பின்னணி
2016 முதல் 2021 வரை அதிமுக ஆட்சிக்காலத்தில் சுகாதாரத்துறை அமைச்சராகப் பதவி வகித்த காலத்தில், தனது வருமானத்தை விட அதிகமாகச் சொத்து சேர்த்ததாக சி.விஜயபாஸ்கர் மற்றும் அவரது மனைவி ரம்யா மீது கடந்த 2021 அக்டோபர் மாதம் லஞ்ச ஒழிப்புத் துறை வழக்குப் பதிவு செய்தது.
.
லஞ்ச ஒழிப்புத் துறை நடத்திய தீவிர விசாரணையைத் தொடர்ந்து, 2023-ல் தாக்கல் செய்யப்பட்ட குற்றப்பத்திரிகையில், கணக்கில் வராத வகையில் ரூ.35.79 கோடி அளவுக்குச் சொத்துகளைக் குவித்துள்ளதாகக் குறிப்பிடப்பட்டது. லஞ்ச ஒழிப்புத் துறையின் இந்த முதன்மை வழக்கின் ஆதாரங்களை அடிப்படையாகக் கொண்டு, அமலாக்கத்துறை சட்டவிரோத பணப்பரிமாற்ற தடைச் சட்டத்தின் கீழ் தனியாக வழக்குப் பதிவு செய்து களத்தில் இறங்கியது.
அமலாக்கத்துறை அதிரடி
இந்த வழக்கின் தொடர்ச்சியாக, கடந்த 2024 மார்ச் 21 அன்று புதுக்கோட்டை மாவட்டம், இலுப்பூரில் உள்ள விஜயபாஸ்கரின் வீட்டுக்குள் நுழைந்து அமலாக்கத்துறை அதிகாரிகள் அதிரடி சோதனை நடத்தினர். அதனைத் தொடர்ந்து, இந்த ஆண்டின் தொடக்கத்திலும் தம்பதி இருவரிடமும் சென்னை சாஸ்திரி பவனில் விசாரணை நடத்தப்பட்டது.
.
இந்நிலையில், தற்போது மீண்டும் இருவருக்கும் சம்மன் அனுப்பப்பட்டுள்ளது. சி.விஜயபாஸ்கர் வரும் நவம்பர்-6 (வெள்ளிக்கிழமை) அன்றும் மனைவி ரம்யா அடுத்த வாரத்தில் ஏதாவது ஒரு நாளிலும் சென்னை மண்டல அலுவலகத்தில் நேரில் விசாரணைக்கு ஆஜராக வேண்டும் என்றும் சம்மன் அனுப்பப்பட்டுள்ளது.
அதிமுக-வில் எடப்பாடி பழனிசாமி தலைமையுடன் ஏற்பட்ட உள்கட்சிப் பூசல்கள் மற்றும் கருத்து வேறுபாடுகள் காரணமாக, 2026 ஜூலை 2 அன்று சி.விஜயபாஸ்கர் அதிமுக-வில் இருந்து விலகி, தமிழக வெற்றிக் கழகத்தில் தன்னை இணைத்துக் கொண்டார். அவருக்கு தவெக-வின் புதுக்கோட்டை மாவட்டச் செயலாளர் பொறுப்பும் வழங்கப்பட்டுள்ளது.
.
அரசியல் கணக்கா… சட்ட நடவடிக்கையா?
அதிமுக-விலிருந்து விலகி தவெக-வில் இணைந்து விஜயபாஸ்கர் தீவிரமாக ஈடுபட்டு வரும் சூழலில், இந்த சம்மன் விவகாரம் மீண்டும் சூடுபிடித்துள்ளது.
"இது வழக்கமான சட்டப்பூர்வமான நடவடிக்கைதான்" என விசாரணை அமைப்புகள் தரப்பில் சொல்லப்பட்டாலும், "தேர்தல் மற்றும் அரசியல் நகர்வுகளை முடக்குவதற்கான நடவடிக்கை" என தவெக ஆதரவாளர்கள் முணுமுணுக்கத் தொடங்கியுள்ளனர்.
விராலிமலை இடைத்தேர்தலில் தவெக சார்பில் சி.விஜயபாஸ்கர் போட்டியிடுவார் என எதிர்பார்க்கப்படும் நிலையில் இந்த சம்மன் அழைப்பு அரசியல் வட்டாரத்தில் அதிர்வுகளை ஏற்படுத்தி உள்ளது.
வரும் வெள்ளிக்கிழமை அமலாக்கத்துறை அலுவலகத்தில் சி.விஜயபாஸ்கர் ஆஜராவாரா அல்லது கூடுதல் அவகாசம் கேட்பாரா என்பதில்தான் அடுத்த கட்ட அரசியல் திருப்புமுனை அடங்கியிருக்கிறது!
.அதிமுக டு தவெக; விஜயபாஸ்கர் உள்ளிட்டோருக்கு முக்கிய பதவி வழங்கிய விஜய்
